Klubi i Barcelonës ka njoftuar zyrtarisht afrimin e sulmuesit Karim Adeyemi, i cili bëhet përforcimi i dytë i skuadrës së drejtuar nga Hansi Flick gjatë kësaj vere. Pas negociatave të zhvilluara në fshehtësi të plotë, 24-vjeçari është transferuar nga Borussia Dortmund në stadiumin Spotify Camp Nou.
Sipas detajeve të marrëveshjes, Barcelona do të paguajë një shumë fikse prej 22 milionë eurosh, ndërsa janë parashikuar edhe 7 milionë euro të tjera në formë bonusesh, të lidhura me objektivat e skuadrës dhe paraqitjet individuale të lojtarit. Gjithashtu, është përfshirë një klauzolë sipas së cilës Borussia Dortmund do të përfitojë 20 për qind nga fitimi i një shitjeje të mundshme të futbollistit në të ardhmen.
Lojtari, i cili ka zhvilluar 146 ndeshje për ekipin gjerman duke realizuar 36 gola dhe 25 asistime, i është nënshtruar me sukses testeve mjekësore. Adeyemi mbërriti në Barcelona të mërkurën, më 15 korrik, dhe pas përmbylljes së procedurave administrative, ka nënshkruar kontratën që e mban atë në Spanjë deri në verën e vitit 2031.
Përditësime
Mediat gjermane kanë shprehur rezerva të forta mbi transferimin e Karim Adeyemi te Barcelona, duke e cilësuar sulmuesin si një 'bombë me sahat' për shkak të mungesës së disiplinës dhe paqëndrueshmërisë në performancë. Raportet theksojnë se stili i tij i jetesës ka ndikuar negativisht në reputacionin e tij profesional. Për më tepër, Adeyemi u përball me një incident ligjor të lidhur me rastin e njohur si 'Kutia Misterioze', duke rezultuar në një gjobë prej 450 mijë eurosh për posedim të sendeve të ndaluara.