Kryetari i Grupit Parlamentar të Partisë Demokratike, Gazment Bardhi, ka reaguar ashpër ndaj vendimit të qeverisë për të financuar koncertin e këngëtarit Kanye West. Përmes një deklarate, Bardhi theksoi se buxheti i shtetit nuk duhet të përdoret për të mbuluar dështimet financiare të aktiviteteve private.
Sipas Bardhit, ndërhyrja e kryeministrit Edi Rama është e papranueshme në një kohë kur qytetarët përballen me vështirësi ekonomike, duke përmendur këtu mungesën e barnave në spitale, kushtet e papërshtatshme në shkolla, si dhe nivelet e ulëta të pagave dhe pensioneve.
“Sot, Edi Rama i tha popullit më të varfër në Evropë se, meqenëse një nxitësi të urrejtjes mes popujve i dështoi koncerti, nuk iu shitën biletat dhe qytetarët e bojkotuan, atëherë koston e këtij dështimi duhet ta paguajnë shqiptarët”, u shpreh Bardhi.
Kreu i grupit parlamentar të PD-së vlerësoi se zgjidhja e vetme për këtë situatë është anulimi i koncertit, duke u shprehur se masa të tilla janë marrë tashmë edhe në disa vende të tjera evropiane. Ai përfundoi duke theksuar se paratë e taksapaguesve shqiptarë nuk duhet të shërbejnë për të financuar pasojat e një aktiviteti privat apo për të mbështetur një artist që, sipas tij, nxit urrejtje.