Në takimin e përbashkët BE-Shqipëri të mbajtur në Parlamentin Europian, kryetari i grupit parlamentar të Partisë Demokratike, Gazment Bardhi, artikuloi shqetësimet mbi rolin e institucionit ligjvënës në vend. Ai deklaroi se Kuvendi i Shqipërisë është larguar nga funksioni i tij kushtetues si organ kontrolli dhe mbikëqyrjeje, duke u reduktuar në një noter të vendimeve të ekzekutivit.
Sipas Bardhit, shumica parlamentare ka refuzuar debatin e kërkuar nga opozita mbi Rezolutën e Parlamentit Europian për Shqipërinë, veprim të cilin e cilësoi si mospërputhje me standardet demokratike. Ai nënvizoi se gjatë sesionit të fundit, opozita nuk ka mundur të zhvillojë asnjë prej 11 interpelancave të kërkuara me kryeministrin.
Gjatë fjalës së tij, Bardhi u ndal edhe te çështja e ish-zv.kryeministres Belinda Balluku. Deputeti demokrat akuzoi mazhorancën për pengim të procedurave pas kërkesës së SPAK, duke e cilësuar këtë si formë të mbrojtjes politike për zyrtarët e lartë. Ai theksoi se këto zhvillime cenojnë shtetin e së drejtës dhe dëmtojnë rrugën e integrimit të Shqipërisë në Bashkimin Europian.
Përditësime
Kryetari i Grupit Parlamentar të Partisë Demokratike, Gazment Bardhi, ka bërë publike fjalën e tij të mbajtur në Parlamentin Europian. Gjatë fjalës, Bardhi kritikoi Kuvendin e Shqipërisë për mungesë të nismave ligjvënëse dhe dështim në sigurimin e llogaridhënies së qeverisë, duke theksuar se institucioni nuk po përmbush rolin e tij udhëheqës në procesin e integrimit europian.