Kryetari i Grupit Parlamentar të Partisë Demokratike, Gazment Bardhi, ka deklaruar se Prokuroria e Posaçme (SPAK) nuk ka dërguar ende në Kuvend një kërkesë të re për heqjen e imunitetit dhe arrestimin e ish-zëvendëskryeministres Belinda Balluku. Sipas Bardhit, kanë kaluar 5 ditë që nga njoftimi se ndaj Ballukut janë shtuar tri akuza të rënda: korrupsion pasiv, pastrim parash dhe fshehje pasurie.
Këto akuza i shtohen procedimit të mëparshëm për shkelje të barazisë në 8 procedura prokurimi, me një vlerë prej 1.2 miliardë euro. Bardhi thekson se provat e reja të siguruara nga SPAK faktojnë ekzistencën e dy vilave të fshehura në resorte luksoze në bregdet. Ai përmend se detajet mbi këto prona, përfshirë shijet arkitekturore për materiale si mermeri blu, gjenden në komunikimet e email-it personal të ish-zv.kryeministres.
Në reagimin e tij, Bardhi akuzon SPAK se po hesht lidhur me rëndimin e masës së sigurimit ndaj Ballukut. Ai ka kërkuar të dijë përse institucioni i akuzës nuk po zbaton standardin e mëparshëm të vendosur nga drejtuesi i SPAK, Klodian Braho. Sipas tij, vonesa aktuale po i jep kohë kryeministrit Edi Rama për të kryer manovra politike, duke pyetur se sa vila të tjera duhet të zbulohen që organi i akuzës t'i bindet ligjit dhe të mos ndikohet nga ajo që ai e quan “Aleanca e Valamarit”.