Gazmend Bardhi, kryetari i grupit parlamentar të Partisë Demokratike, foli për mediat pas seancës plenare të parë për vitin 2026 në Kuvendin e Shqipërisë.
Ai theksoi se prania e zëvendëskryeministres Belinda Balluku në sallë përbën një provokim ndaj qytetarëve. Sipas tij, drejtësia ka kërkuar arrestimin e saj, por mazhoranca e ka kthyer Kuvendin në bunker të korruptuarve.
Bardhi dënoi sjelljen e kryeparlamentarit, duke e akuzuar se ka zyrtarizuar bunkerizimin e Kuvendit. Ai përmendi gjithashtu një provokim të urdhëruar nga kryeministri Edi Rama, që lejon Ballukun të marrë pjesë në seancë në pozicionin e numrit dy, në vend që të jetë në burg.
"Kuvendi i Shqipërisë nuk mund të jetë kurrë streha e të korruptuarve. Duhet t’i shërbejë interesit të qytetarëve dhe barazisë para ligjit", deklaroi Bardhi.
Deputetët e opozitës nuk do të pranojnë funksionimin normal të Kuvendit për sa kohë mazhoranca ta mbajë si bunker. Ai bëri thirrje të mos vonohet mbledhja e Këshillit të Mandateve dhe të mos pengojë më tej kërkesën për arrestimin e zëvendëskryeministres.