Faik Basha, ekspert i sigurisë, u shpreh se Kryeministri Edi Rama ka arritur të tërheqë vëmendjen e Presidentit amerikan Donald Trump për çështjen e krerëve të Ushtrisë Çlirimtare të Kosovës (UÇK), përmes fjalës së tij në ceremoninë e hapjes së Bordit të Paqes.
I ftuar në emisionin "Terminal" të A2 CNN nga Aurora Sulçe, Basha theksoi se deklarata u bë në kohën dhe vendin e duhur, pasi procesi në Gjykatën Speciale ka arritur fazën finale. "Ka mbaruar punën mbrojtja dhe prokuroria, tani do të kemi fjalën e gjyqtarëve", tha ai.
Sipas Bashës, Rama përmendi elementët e nevojshëm për të tërhequr vëmendjen e Trump-it. Kjo u vërejt pas përfundimit të bordit, kur Trump, Presidentja e Kosovës dhe Rama u takuan së bashku për të dhënë detaje më të zgjeruara në lidhje me këtë proces.
Basha nënvizoi nevojën për ndërhyrje politike, pasi, sipas tij, nuk po jepet drejtësi. "Aty po përbaltet një luftë e cila është bërë me mund, me gjak dhe me sakrifikimin e shumë djemve të rinj, vajzave të reja, fëmijëve, pleqve dhe plakave", u shpreh ai.
Prokuroria Speciale ka kërkuar dënim me nga 45 vite burg për Hashim Thaçin, Kadri Veselin, Jakup Krasniqin dhe Rexhep Selimin. Vendimi i Gjykatës Speciale parashikohet të merret në muajin mars.