Sipas një raporti të The Guardian, bashkëpunëtorët e ngushtë të kryeministrit hungarez Viktor Orbán kanë nisur të zhvendosin pasuritë e tyre jashtë Hungarisë pas humbjes së zgjedhjeve ndaj Peter Magyar. Kjo ndodh në prag të marrjes së pushtetit nga qeveria e re në fillim të majit.
Avionë privatë, që burime të The Guardian thonë se transportojnë pasuri të grumbulluara gjatë 16 viteve të sundimit të Orbán që nga viti 2010, janë nisur vazhdimisht nga Vjena. Individë të tjerë po investojnë asetet në vende të huaja. Figura të larta pranë Orbán po shqyrtojnë mundësi për viza në SHBA, me shpresën për punë në institucione të lidhura me bazën elektorale të Trump ose lëvizjen MAGA.
Raporti identifikon tre anëtarë të rrethit të brendshëm të Fidesz që kanë filluar transferimet. Pasuritë drejtohen drejt vendeve të Lindjes së Mesme si Arabia Saudite, Omami dhe Emiratet e Bashkuara Arabe, si dhe Australisë dhe Singaporit, sipas dy burimeve të Fidesz.
Peter Magyar, lideri i partisë opozitare Tisza që fitoi bindshëm, ka ngritur alarmin në rrjetet sociale. Ai akuzon oligarkët e lidhur me Orbán se po transferojnë dhjetëra miliardë forintash drejt Emirateve të Bashkuara Arabe, SHBA, Uruguait dhe vendeve të tjera. Magyar u bën thirrje prokurorit të përgjithshëm, shefit të policisë dhe kreut të administratës tatimore të arrestojnë personat e përfshirë dhe të mos i lejojnë të ikin në vende pa ekstradim.
Pasuritë u grumbulluan kryesisht falë kontrollit mbi ekonominë hungareze dhe kontratave publike për infrastrukturën të financuara nga BE. Ngjarja pasqyron trazirat në Hungari pas festave përgjatë brigjeve të Danubit për fundin e epokës Orbán.