Bashkëshortja e Khameneit vdes pas plagëve nga sulmet ajrore ndaj Iranit

Mansoureh Khojasteh, bashkëshortja 78-vjeçare e udhëheqësit suprem iranian Ali Khamenei, ka ndërruar jetë pas tre ditësh në koma nga plagët e marra gjatë sulmeve ajrore amerikane dhe izraelite të së shtunës. Sipas Iran International, Khamenei humbi jetën menjëherë në të njëjtin sulm.

Konflikti ka hyrë në ditën e tretë me përshkallëzim tensionesh. Gjysmëhëna e Kuqe iraniane raporton 555 viktima në Iran që nga nisja e sulmeve. Mediat shtetërore iraniane flasin për mbi 500 viktima, përfshirë 165 në një shkollë fillore për vajza. Izraeli ka hedhur mbi 2.300 municione në 48 orët e fundit, ndërsa Shtetet e Bashkuara 1.500 të tjera.

Garda Revolucionare e Iranit pretendon se raketat e saj të fundit goditën zyrën e kryeministrit izraelit Benjamin Netanyahu në Tel Aviv dhe selinë e komandantit të Forcave Ajrore izraelite. Autoritetet izraelite nuk e kanë konfirmuar.

Nga ana amerikane, tre ushtarë kanë humbur jetën dhe pesë të tjerë janë plagosur rëndë gjatë sulmeve iraniane në kuadër të Operacionit “Epic Fury”. Presidenti Donald Trump u zotua për hakmarrje, duke thënë se eliminoi Khamenein pasi ky e kishte kërcënuar më parë. Ai deklaroi se operacioni do të zgjasë “katër javë ose më pak”, me “qindra” objektiva të goditura sipas tij, apo rreth dy mijë sipas New York Times.

Izraeli ashpërsuar sulmet ndaj militantëve të Hezbollahut, duke shkaktuar mbi 30 viktima dhe 140 të plagosur. Një raketë iraniane goditi një pallat banimi në Izrael, duke vrarë nëntë persona, ndërsa sirenat u aktivizuan në veri për sulme nga Libani. Tre avionë luftarakë amerikanë u qëlluan aksidentalisht nga mbrojtja ajrore e Kuvajtit, por operacioni vazhdon.

Një zyrtar izraelit deklaroi se operacioni po ecën më shpejt se sa pritej dhe për Teheranin “së shpejti do të jetë fundi i lojës”. Gjermania, Franca dhe Britania do të bashkëpunojnë me SHBA-në.