Në kuadër të masave parandaluese për stinën e vjeshtës, Bashkia e Tiranës ka ndërhyrë për pastrimin e shtratit të lumit Lana. Ky aksion është ndërmarrë me synim shmangien e grumbullimit të mbetjeve, të cilat mund të sjellin probleme gjatë periudhave me prurje të shtuara ujore. Gjatë kësaj ndërhyrjeje në terren, ekipet e bashkisë kanë konstatuar sërish praninë e mbetjeve të hedhura në mënyrë të paligjshme nga persona dhe subjekte të ndryshme, pavarësisht pastrimeve periodike.
Nëpërmjet një njoftimi zyrtar, Bashkia e Tiranës ka përcjellë apelin: "Lana nuk është kosh mbeturinash". Institucioni kërkon nga qytetarët dhe bizneset të tregojnë kujdes dhe të mos hedhin mbetje në shtratin e lumit ose në hapësirat përreth tij. Si masë shtesë për ruajtjen e pastërtisë dhe disiplinimin e situatës, bashkia ka paralajmëruar se ndaj të gjithë atyre që do të evidentohen duke ndotur ambientin do të merren masa administrative dhe do të vendosen gjoba. "Mbajeni pastër! Kundërvajtësit do të gjobiten", theksohet në mesazhin e institucionit.