Bashkimi Evropian ka njoftuar se në muajin janar të vitit 2026 do të nisë heqjen graduale të sanksioneve ndaj Kosovës. Këto sanksione u vendosën në verën e vitit 2023, pasi Prishtina zyrtare zbatuar rezultatet e zgjedhjeve të kontestuara në veriun e vendit, të banuar me shumicë serbe, pavarësisht paralajmërimeve nga Brukseli.
Ky zhvillim mund të ringjallë shpresat evropiane të Kosovës. Viti 2026 mund të jetë ai kur Komisioni Evropian do të shqyrtojë për herë të parë aplikimin për anëtarësim në BE, të dorëzuar në fund të vitit 2022. Gjithashtu, ekziston mundësia për rifillimin e dialogut Kosovë-Serbi, të ndërmjetësuar nga Brukseli, pas një ndërprerjeje dyvjeçare.
Sanksionet ndaj Kosovës kanë qenë të diskutueshme dhe pa precedent në raportet e BE-së me një vend aspirant për anëtarësim. Ato nuk ishin sanksione në kuptimin e plotë politik dhe procedural, por më tepër masa joformale të brendshme të BE-së. Në qarqet e Brukselit, këto u konsideruan si masa, pa ndjekur procedurën standarde që kërkon paraqitje para 27 shteteve anëtare përmes një akti ligjor formal dhe miratim njëzëri.
Për shembull, në vitin 2019, BE-ja ngriti asetet dhe ndaloi vizat për individë nga Turqia, vend kandidat, për shkak të shpimeve të paautorizuara për gaz në Mesdheun Lindor, duke ndjekur një procedurë të tillë. Në rastin e Kosovës, shefi i atëhershëm i politikës së jashtme të BE-së, Josep Borrell, dërgoi një letër shteteve anëtare, ku përshkroi masat dhe rekomandoi zbatimin e tyre, pa detyrim formal.
Drejtoria e Përgjithshme për Zgjerim e BE-së, departament që merret me vendet aspirante për anëtarësim, njoftoi më pas Kosovën për këto masa. Ato përfshinin ngrirjen e fondeve nga buxheti i përbashkët i BE-së, pezullimin e vizitave të nivelit të lartë dhe mosmbajtjen e mbledhjeve të Këshillit të Stabilizim-Asociimit, mekanizmit kryesor të bashkëpunimit.