Bayern Munich është pranë zyrtarizimit të transferimit të Ismael Saibarit, pasi ka arritur një akord me klubin e PSV Eindhoven. Marrëveshja vjen pas negociatave të suksesshme midis dy klubeve, pasi palët kishin dakordësuar më herët kushtet personale me lojtarin.
Sipas raportimeve, vlera e këtij transferimi llogaritet në rreth 50 milionë euro, shifër që përfshin pagesën bazë dhe bonuset e lidhura me performancën. Ismael Saibari, 25 vjeç, do të angazhohet me kampionët e Gjermanisë përmes një kontrate afatgjatë që do të jetë e vlefshme deri në qershor të vitit 2031.
Aktualisht, futbollisti ndodhet në Amerikën e Veriut me Kombëtaren e Marokut për shkak të zhvillimit të Kupës së Botës 2026. Ai tërhoqi vëmendjen ndërkombëtare gjatë ndeshjes hapëse të grupit kundër Brazilit, ku realizoi golin e vetëm për marokenët në barazimin 1-1.
Para këtij transferimi, Saibari ka regjistruar një sezon mjaft efikas me PSV Eindhoven. Në 37 paraqitje në të gjitha kompeticionet, ai ka shënuar 19 gola dhe ka dhënë 9 asistime. Pritet që brenda javës së ardhshme lojtari t'i nënshtrohet kontrollit mjekësor në Shtetet e Bashkuara të Amerikës, përpara se të hidhen firmat zyrtare dhe të bëhet prezantimi i tij.