Bayern Munich u kualifikua në çerekfinalet e UEFA Champions League pas eliminimit të Atalantës me rezultat të përgjithshëm 10-2. Në ndeshjen e kthimit, skuadra bavareze fitoi 4-1, duke regjistruar një nga fitoret më të thella ndaj një skuadre italiane në fazat me eliminim direkt.
Tani, Bayern Munich do të përballet me Real Madridin, rekordmenët e kompeticionit, në çerekfinale. Sulmuesi Harry Kane u shpreh i sigurt se skuadra e tij nuk ka frikë nga askush dhe pret me entuziazëm këto ndeshje.
"Real Madrid është gjithmonë një kundërshtar i rrezikshëm, por ne nuk i trembemi askujt. Këto do të jenë ndeshje emocionuese për të gjithë, mezi po i pres", deklaroi Kane. Ai shtoi se skuadra do të analizojë pikat e forta dhe të dobëta të kundërshtarit, duke ruajtur stilin e lojës së vet.
Kane ishte protagonist në sfidën ndaj Atalantës, ku shënoi dy gola dhe arriti kuotën e 50 golave në Champions League në 66 ndeshje, në të njëjtin nivel me Lionel Messin. Vetëm Erling Haaland dhe Ruud van Nistelrooy e kanë arritur këtë shifër në më pak ndeshje.
Gjithashtu, ai ka shënuar 29 gola në 34 ndeshje të Champions League me Bayern Munich që nga fillimi i sezonit 2023-24, më shumë se çdo lojtar tjetër në këtë periudhë.
Bayern Munich ka shënuar mbi 10 gola në një përballje me dy ndeshje në Champions League për herë të tretë në histori (më parë kundër Sporting në 2008-09 dhe Arsenal në 2016-17), një rekord që asnjë skuadër tjetër nuk e ka arritur më shumë se një herë.