Ministrat e Jashtëm të Bashkimit Evropian arritën të hënën, më 11 maj, një marrëveshje për vendosjen e sanksioneve ndaj kolonëve izraelitë që sulmojnë palestinezët në Bregun Perëndimor.
Shefja e Politikës së Jashtme të BE-së, Kaja Kallas, deklaroi në platformën X se "ishte koha të kalonim nga ngërçi drejt një rezultati". Ajo shtoi se "ekstremizmi dhe dhuna kanë pasoja".
Paketa e sanksioneve përfshin tre kolonë izraelitë, katër organizata kolonësh, si dhe 12 zyrtarë të Hamasit.
Ministri i Jashtëm izraelit, Gideon Saar, reagoi duke thënë se BE-ja "zgjodhi në mënyrë arbitrare dhe politike të vendosë sanksione ndaj qytetarëve dhe entiteteve izraelite për shkak të bindjeve të tyre politike dhe pa asnjë bazë". Ai e cilësoi si "skandaloz" krahasimin mes qytetarëve izraelitë dhe "terroristëve të Hamasit", duke e quajtur një "barazvlerësim moral plotësisht të shtrembëruar".
Për të hyrë në fuqi, sanksionet kërkojnë miratimin zyrtar nga 27 vendet anëtare të Bashkimit Evropian.