Kryetari i Partisë Demokratike të Kosovës (PDK), Bedri Hamza, ka zhvilluar një takim me drejtuesit e Organiztës së Veteranëve të Luftës së UÇK-së (OVL-UÇK) për të diskutuar mbi sfidat aktuale të vendit. Gjatë këtij takimi, Hamza theksoi rëndësinë e ruajtjes së dinjitetit, të vërtetës historike për luftën dhe vlerave për të cilat është sakrifikuar.
Duke vlerësuar lart kontributin e veteranëve, të cilët i cilësoi si bartës të pjesës më të rëndësishme të historisë së Kosovës, Hamza ka bërë thirrje për një tubim masiv më 1 tetor. Tubimi pritet të mbahet në sheshin “Skënderbeu” në Prishtinë, duke filluar nga ora 16:00.
Sipas thirrjes publike, tubimi është paralajmëruar si një bashkim i qytetarëve, studentëve dhe veteranëve kundër, siç u shpreh Hamza, padrejtësisë. Ndërsa shumica e mediave e raportojnë tubimin në kontekstin e përgjithshëm të sfidave të vendit, Gazeta Sinjali e lidh thirrjen për protestë edhe me mbështetjen për ish-krerët e UÇK-së të dënuar nga Dhomat e Specializuara në Hagë.