Kryetari i Partisë Demokratike të Kosovës (PDK), Bedri Hamza, pas mbledhjes së kryesisë së partisë, ka njoftuar se i ka kthyer përgjigje me shkresë kryeministrit në detyrë, Albin Kurti, në lidhje me ftesën për një takim mes liderëve të partive politike. Hamza konfirmoi pjesëmarrjen në këtë takim, duke theksuar nevojën për seriozitet dhe përgjegjësi institucionale për shkak të situatës së vakumit institucional në të cilën ndodhet vendi.
Sipas kreut të PDK-së, ftesat për bisedime të tilla duhet të ndjekin rrugë zyrtare dhe të zhvillohen në ambientet e Kuvendit të Kosovës. Hamza ka propozuar zhvillimin e takimit nesër në ora 09:00.
Në deklaratën e tij, Hamza nënvizoi se prioritetet për qeverisjen, vizioni politik dhe adresimi i sfidave me të cilat po përballet Kosova duhet të kenë përparësi ndaj ndarjes së pozitave qeveritare. Ai shtoi se qëllimi i partisë që ai drejton nuk është thjesht sigurimi i posteve, siç janë ministritë, posti i kryetarit të Kuvendit apo presidentit, por arritja e një dakordimi për programin dhe të ardhmen e vendit.
Përditësime
Zhvillimet e fundit lidhur me ftesën e kryeministrit Albin Kurti për takim me krerët e partive opozitare:
- Kryetari i LDK-së, Lumir Abdixhiku, ka konfirmuar pjesëmarrjen në takim.
- Kryetari i AAK-së, Ardian Gjini, ka refuzuar ftesën, duke kushtëzuar çdo bashkëpunim të mëtejshëm, përfshirë kuorumin për zgjedhjen e presidentit, me plotësimin e 6 kushteve nga ana e Qeverisë.
- Ndërkohë, kandidati për kryeministër nga PDK, Bedri Hamza, pritet të japë përgjigjen e tij ndaj ftesës së Kurtit.
Kryetari i Partisë Demokratike të Kosovës (PDK), Bedri Hamza, zhvilloi takimin e paralajmëruar me kryeministrin Albin Kurti në ambientet e Kuvendit të Kosovës. Pas takimit, PDK e cilësoi dialogun si të zbrazët dhe pa rezultate konkrete. Zyrtarët e partisë deklaruan se pjesëmarrja e tyre u motivua nga përgjegjësia institucionale, duke mohuar çdo pazar politik. Në emër të partisë, Vlora Çitaku kritikoi ashpër kryeministrin Kurti, duke e vlerësuar refuzimin e projektit të gazsjellësit amerikan si dështim strategjik për Kosovën.