Kryetari i Partisë Demokratike të Kosovës, Bedri Hamza, ka mbledhur kandidatët e partisë për deputetë për të diskutuar organizimin dhe mobilizimin për zgjedhjet e përgjithshme të 7 qershorit.
Në takim u theksua rëndësia e angazhimit të përbashkët dhe e komunikimit të vazhdueshëm me qytetarët në të gjitha komunat e vendit. Hamza deklaroi se PDK-ja është e gatshme të kthejë stabilitetin, shpresën dhe ditët e mira për Kosovën, duke shtuar se vetëm përmes bashkimit dhe kontributit të secilit mund të dalë vendi nga kriza dhe stagnimi.
Lista e kandidatëve të PDK-së për këto zgjedhje është e larmishme, me mbi 50 për qind prurje të reja, shtatë kandidatë nga mërgata, të rinj nga Rinia Demokratike e Kosovës dhe profesionistë nga fusha të ndryshme si shëndetësia, inxhinieria, juridiku dhe ndërmarrësia.
Zgjedhjet e përgjithshme priten të mbahen më 7 qershor, ndërsa sot do të hidhet shorti për numrat e partive politike në fletëvotime.
Përditësime
Bedri Hamza u bëri thirrje kandidatëve të PDK-së që të mobilizohen para zgjedhjeve të 7 qershorit. Ai deklaroi: “Është koha që Kosova të ecë përpara: me punë, me vizion, me dashuri për vendin dhe me më shumë kujdes, respekt e përkushtim për çdo qytetar të Kosovës”.