Presidenti i Republikës, Bajram Begaj, zhvilloi një vizitë zyrtare në Sllovaki me ftesë të homologut të tij, Peter Pellegrini. Gjatë takimit tête-à-tête dhe në takimin e zgjeruar mes delegacioneve, dy presidentët diskutuan mbi avancimin e marrëdhënieve dypalëshe, perspektivën evropiane të Shqipërisë dhe Ballkanit Perëndimor, si edhe sfidat e sigurisë si aleate në NATO.
Në konferencën e përbashkët për mediat, Presidenti Begaj vlerësoi mbështetjen e vazhdueshme të Sllovakisë për procesin e integrimit të Shqipërisë në Bashkimin Evropian. Ai e cilësoi Sllovakinë partner dhe aleat të rëndësishëm në rrugëtimin evropian të vendit. Kreu i Shtetit theksoi progresin e Shqipërisë dhe ambicien për të përmbyllur grup-kapitujt brenda vitit të ardhshëm.
"Shqipëria ka hapur për një vit të gjithë grupkapitujt, një kohë rekord, dhe synon mbylljen e tyre në vitin 2027 dhe për t’u bërë pjesë e Bashkimit Evropian si anëtare në vitin 2030", u shpreh Presidenti Begaj. Ai falënderoi Presidentin, qeverinë dhe shtetin sllovak për mbështetjen e dhënë Shqipërisë.
Dy presidentët konfirmuan vullnetin për forcimin e bashkëpunimit në fusha me interes të përbashkët si energjia, turizmi, bujqësia, shëndetësia, energjia e rinovueshme dhe tranzicioni i gjelbër. Ata theksuan nevojën për institucionalizimin e mëtejshëm të bashkëpunimit dhe hapjen e mundshme të linjave direkte ajrore Tiranë-Bratislavë.
Përditësime
Presidenti Begaj falënderoi Sllovakinë për mbështetjen e vazhdueshme dhe shprehu besimin se ajo do të mbetet e fortë. Ai theksoi se strukturat e BE-së kanë njohur reformat e thella të Shqipërisë dhe progresin institucional. Sllovakia është një nga avokatët kryesorë të zgjerimit dhe ka ofruar ekspertizë të çmuar. Qytetarët shqiptarë kanë plotësuar detyrat e tyre, ndërsa Begaj vlerësoi mbështetjen e qartë të qytetarëve sllovakë për zgjerimin.