Presidenti i Republikës së Shqipërisë, Bajram Begaj, zhvilloi sot në Tiranë ceremonitë e pranimit të letrave kredenciale nga dy ambasadorë të rinj të akredituar në vendin tonë.
Në takimin me ambasadorin e Maqedonisë së Veriut, Vele Trpevski, Presidenti Begaj vuri theksin te marrëdhëniet e shkëlqyera fqinjësore. Kreu i shtetit vlerësoi rolin e shqiptarëve në Maqedoninë e Veriut, duke i cilësuar ata si faktorë shtetndërtues, garantues të stabilitetit, demokracisë dhe orientimit euroatlantik të vendit. Presidenti shprehu angazhimin për forcimin e mëtejshëm të këtyre marrëdhënieve në interes të qytetarëve, stabilitetit rajonal dhe perspektivës së përbashkët evropiane.
Në një takim të veçantë, Presidenti Begaj pranoi letrat kredenciale edhe nga ambasadori i ri i Mbretërisë së Arabisë Saudite, Turki Ibraheem Almadhi. Gjatë këtij takimi, Presidenti Begaj i uroi suksese ambasadorit në misionin e tij diplomatik dhe riafirmoi angazhimin e palës shqiptare për forcimin e marrëdhënieve miqësore midis dy vendeve, në dobi të interesave të përbashkëta.