Presidenti i Republikës, Bajram Begaj, i ka dërguar një mesazh urimi Irlandës, e cila ka marrë zyrtarisht drejtimin e Presidencës së radhës së Këshillit të Bashkimit Evropian për gjashtëmujorin e ardhshëm.
Në reagimin e tij, kreu i shtetit vlerësoi rëndësinë e kësaj detyre në një periudhë sfiduese për kontinentin, duke theksuar se për Shqipërinë është inkurajues fakti që politika e zgjerimit të Bashkimit Evropian mbetet ndër prioritetet kryesore të axhendës evropiane.
“Jemi të inkurajuar që zgjerimi i BE-së mbetet një nga prioritetet kryesore dhe shpresojmë në angazhimin për çuarjen përpara të procesit të anëtarësimit të Shqipërisë”, është shprehur Presidenti Begaj.
Po ashtu, Presidenti shprehu besimin se presidenca irlandeze do të luajë një rol pozitiv në forcimin e unitetit, mbrojtjen e vlerave demokratike dhe rritjen e sigurisë në kontinent. “Besojmë se kjo Presidencë do të kontribuojë më tej në forcimin e unitetit, vlerave dhe sigurisë së Evropës”, përfundoi mesazhi i kreut të shtetit shqiptar.
Përditësime
Ministri për Evropën dhe Punët e Jashtme, Igli Hasani, përshëndeti marrjen e Presidencës së Këshillit të BE-së nga Irlanda. Në vijim të urimit të Presidentit Begaj, Ministri Hasani nënvizoi se Shqipëria është në fazën finale të negociatave për anëtarësim, duke kërkuar bashkëpunim të ngushtë me Presidencën irlandeze për avancimin e këtij procesi.