Drejtori i Fondit për të Drejtën Humanitare, Bekim Blakaj, ka kritikuar nivelin e transparencës dhe të informimit të publikut nga ana e Dhomave të Specializuara të Kosovës. Në një prononcim për emisionin “Info Magazine”, ai vuri në dukje se veprimet e këtij institucioni nuk kanë qenë të mjaftueshme për t’i mundësuar publikut të kuptojë thelbin e proceseve gjyqësore që po zhvillohen.
Duke komentuar gjetjet e një raporti britanik, Blakaj theksoi se përkundër përdorimit të komunikatave dhe mesazheve përmes videove, marrëdhënia me shoqërinë nuk i ka përmbushur pritshmëritë. Sipas tij, meqenëse bëhet fjalë për një gjykatë të themeluar nga vetë Kosova, institucioni duhet të angazhohet në një nivel më të lartë bashkëpunimi, jo vetëm me institucionet shtetërore, por edhe me shoqërinë në tërësi.
“Transparenca nuk ka ekzistuar ashtu siç e kemi pritur. Ndonëse ekzistojnë programe të informimit dhe ndërgjegjësimit, institucioni nuk ka bërë mjaftueshëm që publiku në Kosovë të kuptojë se çfarë po ndodh atje”, deklaroi Blakaj.