Dhoma e Akuzave në Belgjikë ka rrëzuar ankesën e një shtetaseje kanadeze me origjinë kineze, duke konfirmuar qëndrimin e saj në paraburgim edhe për një periudhë prej një muaji. Vendimi u mor gjatë një seance me dyer të mbyllura, pas shqyrtimit të ankesës së bërë nga e dyshuara kundër vendimit të mëparshëm gjyqësor.
E dyshuara, e identifikuar nga mediat si Claire Z dhe e cila raportohet se është në të tridhjetat, akuzohet për veprimtari spiunazhi gjatë kohës që shërbente si praktikante pranë Shtabit Suprem të Fuqive Aleate në Evropë (SHAPE), në qytetin e Mons.
Autoritetet belge, përmes Zyrës së Prokurorit Federal, kanë konfirmuar se hetimi përqendrohet te akuzat për “spiunazh në favor të një vendi të tretë” dhe “pjesëmarrje në një organizatë kriminale”. Pavarësisht hetimeve të nisura pas bastisjeve në apartamentin dhe zyrën e saj në korrik, detajet mbi vendin për të cilin dyshohet se ka spiunuar apo natyra e saktë e informacionit të marrë mbeten të panjohura.
Nga ana e saj, SHAPE ka bërë të ditur përmes një zëdhënësi se nuk ka asnjë tregues që aktiviteti i dyshuar të ketë ndërprerë operacionet ushtarake të NATO-s. Ministri kanadez i Sigurisë Publike, Gary Anandasangaree, deklaroi se qeveria është e përkushtuar për të zbardhur plotësisht rastin dhe për të rishikuar proceset e sigurisë. Ndërkohë, prokuroria belge ka theksuar se hetimet vazhdojnë, ndërsa ende nuk është përcaktuar një datë për fillimin e procesit gjyqësor.