Berisha akuzon korrupsionin për bllokimin e rrugës Librazhd-Prrenjas

Sali Berisha, kryetar i Partisë Demokratike, reagoi më 21 shkurt 2026 për bllokimin e segmentit rrugor Dragostunjë-Prrenjas, i cili ka paralizuar qarkullimin në zonën e juglindjes së vendit.

Sipas tij, situata ka lënë të bllokuar për orë të tëra qindra qytetarë në automjetet e tyre. Berisha hodhi poshtë pretendimet se dëmtimi i rrugës erdhi nga kushtet atmosferike dhe e lidhi me ndërhyrje të paligjshme në shtratin e lumit.

Ai deklaroi se “rrugën nuk e shembi moti, por korrupsioni”. Në reagimin në rrjetet sociale, Berisha akuzoi ministren e Infrastrukturës dhe Energjisë, Belinda Balluku, dhe ministren e Turizmit dhe Mjedisit, Mirela Kumbaro, për lejim të këtyre ndërhyrjeve pa modelin e studiuar të domosdoshëm dhe pa leje.

Ndërhyrjet, sipas Berishës, kanë shkatërruar shtratin e lumit dhe mbështetjen e rrugës ekzistuese, duke çuar në shembjen e segmentit. Ai e quajti këtë një “akt shumë të rëndë kriminal” dhe dënoi kompaninë përgjegjëse, si dhe “heshtjen kriminale”.

Deklarata e plotë e Sali Berishës:

"Sot tërë ditën e gjithë juglindja e vendit është e bllokuar. Qindra e qindra pasagjerë kanë kaluar këtë ditë në makinat e tyre të bllokuara në segmentin e rrugës Dragostunjë-Prrenjas. Ky bllokim është vepër totale e paligjshmërisë dhe korrupsionit, papërgjegjësisë së dy ministrave Belinda Balluku dhe Mirela Kumbaro, të cilat kanë lejuar të ndërhyhet në lum pa modelin e studiuar të domosdoshëm dhe ndërhyrja në lum jo vetëm që ka shkatërruar shtratin e lumit, por ka shkatërruar dhe mbështetjen për rrugën ekzistuese dhe shembjen e saj sot. Dënoj këtë akt si një akt shumë të rëndë kriminal, për të cilin përgjegjësia absolute kryesore ka Belinda Balluku dhe Mirela Kumbaro, natyrisht dhe kompania e cila ka kryer një akt kriminal pa leje, ka ndërhyrë në shtratin e lumit pa asnjë model dhe asnjë leje. Dënoj me forcë këtë veprim dhe heshtjen kriminale."