Kryetari i Partisë Demokratike, Sali Berisha, ka reaguar pas protestës së zhvilluar para Parlamentit, duke akuzuar Ministrinë e Brendshme për dezinformim publik në lidhje me numrin e policëve të lënduar. Sipas tij, këto deklarata kanë shërbyer për të përligjur përdorimin e forcës, gazit lotsjellës dhe mjeteve të tjera ndaj protestuesve.
Në denoncimin e tij, Berisha deklaroi se departamentet përkatëse të Partisë Demokratike kanë kryer verifikime pranë urgjencave të institucioneve mjekësore në Tiranë. Sipas kreut të PD-së, rezultatet tregojnë se efektivët e dërguar në spital nuk kanë paraqitur lëndime dhe janë larguar pa pasur nevojë për ndërhyrje mjekësore.
Si pjesë e argumentit, Berisha ka shpërndarë pamje të një efektivi të identifikuar si inspektori Gjoka. Në denoncim pretendohet se polici është filmuar duke u rikthyer në aksion vetëm 20 minuta pasi ishte raportuar si i lënduar. Berisha e ka cilësuar këtë situatë si "vepër penale të rëndë" dhe mashtrim për të fshehur dhunën e ushtruar ndaj protestuesve.