Kryetari i Partisë Demokratike, Sali Berisha, deklaroi sot nga Lapraka se kryeministri Edi Rama ka hakuar sistemin kibernetik dhe kompjuterët e SPAK-ut për të vjedhur materialet dhe dosjet e prokurorëve. Sipas tij, qëllimi ka qenë të shihte se çfarë hetohej për të në ato dosje.
Berisha e cilësoi Ramën si autorin e organizimit të sulmit ndaj organit të akuzës. Dosja në fjalë tani ka të akuzuar dhe të pandehur si grup i strukturuar kriminal, mes tyre ish-kreun e Burgjeve, Agim Ismaili.
Në fjalimin para mbështetësve, Berisha tha: «Kryeministër që u hakeron kompjuterat prokurorëve, për të parë nëse janë të shkruajtura aty krimet e tij. Nuk presim ne t’i zgjidhin as prokurori, as gjykatësi dhe as nga jashtë, do i zgjidhim vetë, do përballemi në rrugë me regjimin deri në fitoren e PD-së».
Kreu i opozitës shtoi se qeveria vjedh në mënyrë të papërsëritshme dhe nuk ndalet, por gjendet përballë guximit të demokratëve dhe është damkosur ndërkombëtarisht. Ai u tha mbështetësve: «Secili nga ju është 100 herë më i fortë dhe i guximshëm se 100 hajdutët e qeverisë».