Partia Demokratike zhvilloi më 31 mars 2026 një takim të posaçëm për Reformën Territoriale. Në fjalën e tij, kryetari i saj, Sali Berisha, e cilësoi reformën si një nga goditjet më të rënda ndaj interesave të qytetarëve shqiptarë dhe zhvillimit të vendit.
Berisha argumentoi se mënyra e zbatimit të saj përbën një model të paprecedentë, duke marrë parasysh karakteristikat gjeografike të Shqipërisë. Ai theksoi se rreth 75-80% e territorit është malor dhe kodrinor, por është aplikuar një model që nuk ekziston as në vendet më të sheshta të botës. Sipas tij, ky model ka çuar në fshirjen e popullatës nga këto territore dhe në spastrim etnik, si komponent i platformës së Cubriloviçit.
Ai akuzoi se antireforma kishte dy kritere themelore: vjedhjen dhe votën. Me një të rënë të lapsit u shuan dhjetëra komuna dhe bashki kundërshtare. Berisha solli si shembull pabarazinë në numrin e njësive të qeverisjes vendore: në një zonë me 1 milionë banorë ka vetëm 4 njësi, ndërsa në një tjetër me 120 mijë banorë ka 7 njësi, duke krahasuar Tiranën me Gjirokastrën.
Berisha kritikoi gjithashtu zbatimin e Paketës së Maleve në Maminas, ku sipas tij nuk ka banorë ose ka shumë pak për investime. Ai e quajti autorin e reformës "kryeinjorant" dhe armik, si dhe dyshoi në saktësinë e të dhënave të regjistrimit të INSTAT-it, duke i cilësuar ato si falsifikime.