Sali Berisha, kryetar i Partisë Demokratike, në një dalje për media më 25 mars, hodhi akuza ndaj televizionit ABC dhe gazetarit Sokol Balla.
Berisha e cilësoi televizionin ABC si TeleLubia, duke thënë se transmeton 24 orë në 24 orë vetëm materiale në mbrojtje të Belinda Ballukut, të cilën e quajti "hajdutja më e madhe e kombit shqiptar pas Edi Ramës". Ai denoncoi përdorimin e valës publike për interesa private, duke nënvizuar se "vala është pasuri e qytetarëve dhe nuk mund të shfrytëzohet për interesa që bien ndesh me interesin publik".
Sipas Berishës, ky televizion personalizohet me një "delikuente" dhe sulmon verbërisht për ta mbrojtur atë, duke treguar se është pjesë e organizatës kriminale të Ballukut. Ai akuzoi Sokol Ballën si anëtar të organizatës kriminale Balluku-Rama dhe i tha atij të marrë avokat, pasi "edhe vetë je në tavë".
Berisha theksoi se ky abuzim tejkalon çdo kufi dhe nuk ndodh as në televizionin shtetëror. Ai denoncoi rreshtimin e dhjetëra dëshmitarëve të rremë nga Shqipëria dhe Kosova, ose konkretisht 6 dëshmitarë të rremë nga viset shqiptare, për të mbrojtur një "hajdutje të pamëshirë dhe të pangopur". Kreu i PD-së deklaroi se ai që i fton këta dëshmitarë është pjesë e organizatës kriminale.