Kreu i Partisë Demokratike, Sali Berisha, në një konferencë për media më 16 shkurt 2026, shënjestroi Igli Tafën, të emëruarin në krye të Agjencisë Kombëtare të Shoqërisë së Informacionit (AKSHI).
Berisha e cilësoi Tafën si “kukull dhe vegël të klanit të Surrelit”. Sipas tij, Tafa, ish-drejtor i Sigurisë Kibernetike, është autor i tenderit prej 75 milionë euro të dhënë Armand Frangut, të quajtur baxhanak i kryeministrit Edi Rama ose kunati i florinjtë i Lindës Rama. Në këtë tender, sipas Berishës, nuk vërtetohet asnjë punim apo shpenzim, përveç plaçkitjes së 75 milionë eurove nga thesari i shtetit, me transhin e fundit prej 25 milionë euro një muaj më parë, të lëshuar sipas urdhrit të Ramës nga ministri i Financave.
Berisha akuzoi Ramën se synon ta mbajë AKSHI-n me çdo kusht për të plaçkitur qindra milionë euro. Ai tha se rroga e Tafës, e cila ishte dy herë më e madhe, u rregullua nga Rama për ta përshtatur me interesat e klanit. Sipas Berishës, AKSHI po kthehet në “ndërmarrje shtetërore private”, ku duart e klanit Rama, nëpërmjet klanit Frangu, shtrihen plotësisht. Rama, sipas tij, nuk heq dorë nga pushteti për të vazhduar vjedhjet ndaj qytetarëve.
Në të njëjtën deklaratë, Berisha kërkoi hetim urgjent për pretendimet e tij mbi kërcënimet e Ramës ndaj gjyqtarëve të Gjykatës Kushtetuese, përfshirë telefonata pas mesnate për ushtrim presionesh në çështje të caktuara.