Kryetari i Partisë Demokratike, Sali Berisha, gjatë një konference për mediat në selinë e partisë, ka dënuar deklaratat e kryeministrit Edi Rama lidhur me pjesëmarrjen e shtetasve nga Kosova dhe Maqedonia e Veriut në protestat e zhvilluara në Tiranë.
Sipas Berishës, qytetarët që kanë mbërritur në kryeqytet po protestojnë për një "kauzë të drejtë" që lidhet me lirinë dhe dinjitetin kombëtar. Ai ka hedhur poshtë pretendimet se këta pjesëmarrës mund të konsiderohen si elementë negativë.
"Dënoj sulmet ndaj qytetarëve të Kosovës e Maqedonisë së Veriut që marrin pjesë në protestë kundër padrinos. Për një kauzë të drejtë luftojnë ata, për lirinë e dinjitetin e shqiptarëve. Etiketimi i tyre si pushtues është etiketimi i një armiku të egër të shqiptarëve", u shpreh Berisha gjatë fjalës së tij.
Kreu i PD-së theksoi se mbështetja nga trojet e tjera shqiptare është pjesë e një lëvizjeje për llogaridhënie nga qeveria, duke e konsideruar pjesëmarrjen e tyre si një akt solidariteti.