Kryetari i Partisë Demokratike, Sali Berisha, reagoi sot në lidhje me tensionet e shënuara një ditë më parë gjatë protestës së zhvilluar para ambienteve të Kuvendit të Shqipërisë. Në një deklaratë për mediet nga selia blu, ai dënoi atë që e cilësoi si dhunë shtazore dhe çnjerëzore të ushtruar nga Policia e Shtetit ndaj pjesëmarrësve.
Sipas Berishës, gjatë ndërhyrjes së policisë janë agresuar gra me fëmijë të vegjël në karroca, si dhe qytetarë të cilët, sipas tij, nuk kishin asnjë lidhje me organizimin e protestës. Ai theksoi se janë kërcënuar edhe eksponentë të protestës, vetëm për shkak të ushtrimit të së drejtës për të protestuar në mënyrë paqësore.
Duke komentuar zhvillimet, kreu i opozitës deklaroi se kryeministri Edi Rama është i plagosur politikisht dhe se i duhet dhënë shtyrja përfundimtare. Berisha u bëri thirrje anëtarëve dhe mbështetësve të Partisë Demokratike, si dhe të gjithë qytetarëve, që t'i bashkohen lëvizjes për të shpëtuar vendin. Sipas tij, kërkesat e kësaj proteste janë në mbrojtje të interesave jetike të shqiptarëve, të cilat po cenohen nga qeverisja aktuale.
Ngjarja vjen pas tensioneve të regjistruara gjatë protestës, ku mes protestuesve dhe forcave të policisë pati përplasje fizike. Palët kanë paraqitur versione të ndryshme mbi dinamikën dhe zhvillimet në terren gjatë këtyre përplasjeve.