Partia Demokratike mbledi të shtunën grupin e saj parlamentar, ku kreu Sali Berisha foli i pari për nismën e Partisë Socialiste për ndryshimin e nenit 242 të Kodit të Procedurës Penale lidhur me pezullimet nga detyra.
Berisha deklaroi se situata në Shqipëri po bëhet më e rrezikshme dhe se Edi Rama sillet si lopë e çmendur. Ai tha: «Në një sfidë të hapur të Kushtetutës së vendit, të ligjeve, kodeve të vendit, ai vendos në vend të zbatimit të tyre, të kërkesës së bazuar të Prokurorisë Speciale, krijimin e barrierave speciale për mbrojtjen e vetes së tij. Vendos të tejkalojë Kushtetuesen përmes ligjeve personale, krijimin e mburojave në mënyrë që ai dhe organizata kriminale që kryeson, të vijojë plaçkitjen e Shqipërisë».
Sipas Berishës, amendamenti përfshin edhe gjykatësit kushtetues në mburojë ligjore ndaj pezullimit, çka e konsideroi përpjekje për t’i korruptuar me ligj. Ai theksoi se Kushtetuta parashikon pezullimin taksativ për gjykatësit kushtetues, ndërsa nuk e lejon për të zgjedhurit nga populli, përfshirë presidentin.
«Duhet të jesh lopë e çmendur që të mos lexosh kushtetutën e cila në mënyrë taksative përcakton se gjykatësi kushtetues pezullohet», shtoi Berisha, duke akuzuar Ramën për degradim psiqik.