Kreu i Partisë Demokratike, Sali Berisha, ftoi më 5 nëntor drejtuesit e forcave të reja politike Agron Shehajn, Arlind Qorin dhe Adriatik Lapajn të bashkohen me opozitën, me synim largimin e kryeministrit Edi Rama nga pushteti. Në një intervistë televizive, Berisha tha se është i gatshëm të bashkëpunojë me çdo aktor politik që synon largimin e Ramës nga qeverisja dhe se nuk ka paragjykime ndaj forcave opozitare.
“Bashkohem që nesër”, tha Berisha, duke përsëritur ftesën për bashkëpunim. Ai u shpreh i hapur për takime me përfaqësues politikë që kanë si synim largimin e Ramës nga pushteti.
Të tre drejtuesit e partive të ftuara kundërshtuan bashkimin me opozitën e drejtuar nga Berisha. Agron Shehaj, i Partisë Mundësia, tha se pranimi i ftesës nuk do të ndihmonte në largimin e Ramës. Ai iu referua edhe thirrjes së protestuesve për t’u larguar nga partitë e vjetra.
Adriatik Lapaj, i Shqipëria Bëhet, tha se Rama dhe Berisha duhet të tërhiqen nga skena politike, por shtoi se nuk vendos shenjë barazie mes Berishës dhe demokratëve. Arlind Qori, i Lëvizjes Bashkë, kundërshtoi bashkimin me PD-në ose PS-në. Ai i përshkroi Ramën dhe Berishën si aktorë që, sipas tij, bashkëqeverisin, dhe tha se nuk e konsideron Berishën kreun e Partisë Demokratike.
E ardhmja e drejtimit të PD-së
Berisha foli edhe për mundësinë e një lidershipi të ri në PD. Ai tha se do të largohet nga drejtimi vetëm nëse ndien pamundësi fizike ose mendore për të përmbushur detyrat. I pyetur nëse Belind Këlliçi mund të jetë drejtues i ardhshëm, Berisha tha se gara për drejtimin e partisë mbetet e hapur, por nuk dha afat konkret për largimin e tij.
Duke iu referuar përplasjes së mëparshme me Lulzim Bashën, Berisha tha se u rikthye në krye të partisë për “dinjitetin tim” dhe “dinjitetin e Partisë Demokratike”. Ai e cilësoi përballjen me Ramën si një nga periudhat më interesante të jetës së tij politike dhe mohoi se po vepron nga dëshira për pushtet.
Berisha akuzoi kryeministrin se synon të qëndrojë në pushtet me çdo kusht. Ai e krahasoi situatën politike në Shqipëri me fundin e regjimit komunist dhe me zhvillimet në Rumani.