Sali Berisha, kryetar i Partisë Demokratike, ka njoftuar protestën e radhës kombëtare më 22 mars në Tiranë. Ai ka ftuar mbështetësit e opozitës nga e gjithë Shqipëria të mblidhen në kryeqytet për të vazhduar atë që e quajti kryengritje paqësore deri në fitoren përfundimtare.
Në fjalimin e mbajtur para selisë së Partisë Demokratike dhe pas protestës së zhvilluar sot para Parlamentit, Berisha u shpreh: «Me 22 mars, e gjithë Shqipëria në Tiranë. E gjithë Tirana në rrugë. Të vazhdojmë kryengritjen tonë paqësore gjer në fitoren përfundimtare. Fitore, fitore, fitore!».
Protesta e sotme, e cila përkon me seancën plenare të Kuvendit ku u refuzua kërkesa e SPAK-ut për autorizimin ndaj Belinda Ballukun, zgjati rreth 110 minuta. Ajo ishte më e shkurtra ndër protestat e deritanishme të opozitës, me incidente të pakta si heqja e gardheve metalike dhe ndezja e disa tymuesve. Fjalime mbajtën deputeti Klevis Balliu dhe Ilirjana Kuçana, ndërsa Berisha e mbylli duke falënderuar pjesëmarrësit.
Protesta e ardhshme përkon me festën e Sulltan Novruzit dhe zhvillohet një ditë pas Asamblesë Socialiste.
Përditësime
Sali Berisha deklaroi se Edi Rama shënoi "vetëvrasjen e tij politike" duke votuar kundër kërkesës së SPAK-ut për Belinda Ballukun.
Klevis Balliu u përjashtua nga seancat plenare.