Sali Berisha, kryetar i Partisë Demokratike, paralajmëroi në një konferencë për shtyp të mbajtur në selinë e PD-së se protestat do të zgjerohen në të gjithë vendin dhe nuk do të përqendrohen vetëm në Tiranë.
Ai deklaroi se tubimet do të ngrenë kudo ku ekziston pakënaqësia popullore. “Do të ketë kudo protesta, aty ku është pakënaqësia do të ngrihet protesta. Regjimi do të përballet në të katër anët me qendresë të fuqishme popullore”, u shpreh Berisha.
Kreu i PD-së vlerësoi si të suksesshme protestën e së dielës dhe theksoi se partia e tij është pro kryengritjes paqësore, kundër protestave të dhunshme. Sa i përket dënimit të ambasades gjermane në Tiranë për përdorimin e dhunës, ai sqaroi se në protestat e fundit nuk ka pasur policë të plagosur. “Në kushtet e një grushti shteti janë të ligjshme të gjitha mjetet. Ne dhunën më të madhe e konsiderojmë marrjen e drejtësisë nga pushteti ekzekutiv”, tha ai.
Sa i përket takimeve të Ervin Salianjit me bazën e PD-së, Berisha e cilësoi atë si të vetëpërjashtuar. “I vetëpërjashtuari është i vetëpërjashtuar, nuk ndryshon asgjë. Ai zgjodhi vetëbirësimin, iku mori fund”, u shpreh kreu demokrat, duke shtuar se nuk ka kohë të merret me këtë çështje.
Protestat, sipas Berisha, do të vazhdojnë deri në rrëzimin e qeverisë Rama.