Sali Berisha, kryetar i Partisë Demokratike, priti më 16 prill në zyrën e tij në Tiranë një përfaqësi të zgjeruar të Këshillit Koordinues të Diasporës (KKD). Përfaqësia përbëhej nga Lazim Destani (kryetar), Anila Smørgrav (nënkryetare), Emina Cunmulaj, Drita Gjongecaj, Ira Londo, Mirela Mezani, Brikena Muharremi dhe Rosario Peta.
Përfaqësuesit e KKD-së kërkuan nga opozita dhe qeveria që në zgjedhjet e radhës diaspora të përfaqësohet me kandidatë të saj në një zonë elektorale.
Berisha vlerësoi historinë e diasporës si histori të shqiptarëve të suksesshëm, veçanërisht të grave dhe vajzave. Ai tha se pas Kadaresë dhe Shën Terezës, vajzat shqiptare në botë janë më të famshmet dhe se me to krenohemi.
Ai theksoi se një tërësi kombëtare ka rëndësi të jashtëzakonshme. Shqipëria është në rrezik të madh ekzistencial për shkak të shpopullimit. Sipas Eurostat-it, në periudhën 2015-2024 kanë emigruar 1.099 milion shqiptarë vetëm në zonën Shengen. Nëse kjo vazhdon, në pesë dekada Shqipëria rrezikon të mos ekzistojë më.
Në lidhje me ekonominë, Berisha u ndal te ndikimi i narkotrafikut, i cili ka krijuar "superleke" dhe ka dobësuar euron si dhe dollarin, duke çuar deri në falimentimin e eksportuesve. Ai kritikoi "Ballkanin e Hapur" si politikë apatride dhe shpopulluese të Edi Ramës, që dobëson ekonominë dhe minon projektin kombëtar. Gjithashtu, i quajti kullat e larta dhe të shtrenjta të Tiranës monumente të drogës dhe korrupsionit.
Biseda u zhvillua në tone miqësore, ndërsa diaspora shprehu falënderim për mbështetjen e Berishës ndaj angazhimit dhe kontributit të saj në vend.