Gjatë një bashkëbisedimi me qytetarët, kryetari i Partisë Demokratike, Sali Berisha, denoncoi praninë e pretenduar të personave të infiltruar nga Shërbimi Informativ Shtetëror (SHISH) në protestat e fundit. Sipas denoncimit të një qytetari, këta individë kanë ushtruar kërcënime me armë ndaj pjesëmarrësve në tubime.
Sali Berisha i cilësoi këto ngjarje si praktika të një "shteti policesk" dhe akuzoi kryeministrin Edi Rama dhe drejtuesen e SHISH, Vlora Hyseni, si urdhërues të këtyre akteve. "Dënoj me forcë të madhe akte të tilla të porositura nga Rama dhe nga agjentja Vlora Hyseni. E garantoj zonjën se do bëhet përgjegjëse për këto akte," u shpreh Berisha.
Kreu i opozitës u bëri thirrje qytetarëve që të sigurojnë prova fotografike ose filmike të këtyre veprimeve për t'i denoncuar publikisht. Ai akuzoi qeverinë për përpjekje të vazhdueshme për të shmangur reflektimin ndaj kërkesave legjitime të qytetarëve, duke zgjedhur sulmet e personalizuara ndaj opinionbërësve dhe figurave publike.
Sipas Berishës, retorika qeveritare ka tentuar të përbaltë simbole kombëtare dhe figura historike, duke dëshmuar një arrogancë institucionale ndaj zërit kritik të rinisë. Në këtë kontekst, Berisha përsëriti thirrjen për dorëheqjen e kryeministrit Edi Rama. Lidhur me thirrjet e dëgjuara në shesh kundër tij dhe kryeministrit, Berisha i cilësoi ato si përpjekje të orkestruara nga një grupim që ai e quajti "opozita e opozitës", me qëllim zbutjen e pozitave të qeverisë.