Sali Berisha, kryetar i Partisë Demokratike, deklaroi se Partia Socialiste nuk është parti politike, por organizatë kriminale. Ai e bëri këtë deklaratë para selisë së PD-së në Tiranë, pas takimit me misionin faktmbledhës të PPE-së, ku dorëzoi një libër me 1500 gjetje nga PD-ja.
Deklarata erdhi në vijim të pyetjes për mbledhjen e grupit parlamentar të PS-së ditën e nesërme, ku pritet të diskutohet kërkesa e SPAK-ut për heqjen e imunitetit të zv/kryeministres Belinda Balluku. Berisha u shpreh: “Ajo është një repart krimi. Ajo parti ka faktuar shqiptarëve se është mater matrix e krimit në Shqipëri. Ajo parti ka krimin substancën, shpirtin, mendjen e vet. Sepse është ajo parti që ka sjellë këtë situatë, është ajo tolerancë, ajo bashkëfajësi që kanë ata në vjedhje. Aty Sara Mile dhe Arkend Balla janë lule çfarë janë ministrat dhe zyrtarët e tjerë të implikuar. Prandaj, unë mendoj se mund ta përdorni fjalën parti, por më shumë se çdo gjë tjetër i shkon fjala organizatë kriminale.”
I pyetur për ngjarjen te xhamia e Namazgjasë më 20 shkurt gjatë protestës së PD-së, Berisha mohoi praninë e protestuesve të PD-së brenda xhamisë dhe fajësoi policinë për provokim, sulm dhe përdorim të gazit lotsjellës. Ai theksoi se PD-ja kishte mbajtur distancë te Ura e Tabakëve dhe garantoi se nuk do zhvillojë protesta në territorin e xhamisë. “Këta banditë revoltuan besimtarët që falnin namazin, provokuan duke sulmuar”, shtoi ai, duke paralajmëruar PS-në kundër sulmeve të ngjashme.