Sali Berisha, kryetar i Partisë Demokratike, zhvilloi sot një konferencë për mediat në selinë e PD-së, ku dha detaje nga vizita e tij në Strasburg si anëtar i Asamblesë Parlamentare të Këshillit të Europës.
Ai u shpreh se gjatë qëndrimit ka paraqitur fakte dhe dokumente mbi situatën dramatike në Shqipëri, duke e cilësuar vendin si narko-shtet dhe nën diktaturë autoritare. Në grupin parlamentar të Partisë Popullore Evropiane dhe në seancat plenare, Berisha njoftoi për rrezikun e madh që organizata kriminale qeveri shqiptare, e kryesuar nga Edi Rama, paraqet jo vetëm për shqiptarët, por edhe për mbarë Europën.
Sipas Berishës, Edi Rama përbën rrezik madhor për vendet evropiane, pasi është padrino i karteleve më të fuqishme të drogës. Këto kartele zënë vendin e parë në eksportin e marijuanës drejt Europës, janë aksionerë kryesorë në tregun e kokainës dhe heroinës, si dhe transportues kryesorë të drogës nga Amerika Latine në portet evropiane. Ai theksoi se portet shqiptare u shërbejnë si porte të lira.
Berisha përmendi gjithashtu qindra leje për hotele, resorte turistike, kulla korrupsioni dhe droga, të dhëna nga Edi Rama pas zgjedhjeve të 11 majit si shpërblim për pjesëmarrjen në zgjedhje.
Ai falënderoi grupet parlamentare të Asamblesë, të cilat, sipas tij, në unanimitet anuluan takimet me Ramën pas fjalimit të këtij të fundit në stilin e Gadafit.