Kryetari i Partisë Demokratike, Sali Berisha, gjatë fjalës së tij në seancën e Kuvendit të Shqipërisë, ka akuzuar qeverinë për dështim në thithjen e investimeve të huaja. Sipas tij, gjatë 13 viteve të fundit, tregu shqiptar nuk ka përfituar investime të huaja, ndërsa theksoi se asnjë tender në këtë hark kohor nuk është fituar nga kompani evropiane.
Duke e cilësuar investimin e huaj si një element me rëndësi jetike për zhvillimin ekonomik, Berisha pohoi se politikat qeveritare po ndikojnë negativisht në ambientin e biznesit, duke çuar në largimin e investitorit të vetëm të huaj që ka mbetur në Shqipëri.
Në fjalën e tij, Berisha bëri një krahasim me periudhën kur ai drejtonte qeverinë, duke përmendur angazhimin prej 2 miliardë eurosh në sektorin e energjetikës, ku veçoi projektet për kaskadën e Devollit dhe të Fanit. Ai nënvizoi se në periudhën 2008-2013, investimet e huaja në Shqipëri varionin nga 1.2 miliardë euro deri në 1.4 miliardë euro në vit.