Sali Berisha, kryetar i Partisë Demokratike të Shqipërisë, së bashku me një delegacion të Partisë Republikane të kryesuar nga Fatmir Mediu, zhvilloi një takim me Stephen Harper, president i International Democrat Union (IDU), në kuadër të Forumit të IDU-së në Zagreb më 1 maj.
Berisha shprehu mirënjohje për mbështetjen e vazhdueshme të IDU-së ndaj Partisë Demokratike gjatë periudhave të vështira politike në Shqipëri. Ai ngriti shqetësime serioze në lidhje me gjendjen demokratike, duke iu referuar vlerësimeve ndërkombëtare që e klasifikojnë vendin si “autokraci elektorale”.
Në fokus të diskutimit ishin:
- Mbrojtja politike e korrupsionit në nivele të larta, përfshirë rastin e Belinda Balluku, ku shumica socialiste refuzoi t’i heqë imunitetin dhe pengoi arrestimin e saj;
- Ndikimi i karteleve të drogës dhe i krimit të organizuar në proceset politike dhe ekonomike;
- Shndërrimi i ekonomisë shqiptare në “narco-ekonomi”, me tentakula në të gjithë sektorët dhe kthimin e Shqipërisë në parajsë fiskale për pastrimin e të ardhurave nga trafiku i drogës;
- Persekutimi sistematik i opozitës, me keqtrajtimin e ish-presidentit Ilir Meta.
Berisha nënvizoi emigrimin masiv si plagë të madhe, me mbi 1.1 milionë qytetarë, kryesisht të rinj, të larguar drejt Bashkimit Europian. Ai theksoi se Shqipëria përmbush kryesisht kriteret gjeostrategjike, ndërsa integrimi europian mbetet i bllokuar për shkak të kapjes së shtetit nga qeverisja aktuale dhe mungesës së standardeve demokratike reale.
Stephen Harper vlerësoi si zhvillim pozitiv mbështetjen e fortë të qytetarëve shqiptarë për NATO, pavarësisht politikave qeveritare. Në përfundim, ai rikonfirmoi mbështetjen e plotë të IDU-së për Partinë Demokratike, forcat opozitare dhe procesin e integrimit europian të Shqipërisë.
Takim me ministrin e Jashtëm maqedonas
Gjatë forumit, Berisha zhvilloi një takim me Timço Mucunski, ministrin e Jashtëm të Maqedonisë së Veriut. Palët diskutuan respektimin dhe mbrojtjen e të drejtave të komunitetit shqiptar si element kyç për stabilitetin e brendshëm dhe funksionimin demokratik, si dhe thellimin e bashkëpunimit ekonomik.