Sali Berisha, kryetar i Partisë Demokratike, zhvilloi një takim bilateral me kryeministrin e Kroacisë, Andrej Plenković, në Zagreb më 1 maj 2026, në kuadër të punimeve të Forumit të International Democrat Union (IDU).
Takimi u zhvillua në një atmosferë miqësore dhe konstruktive. Diskutimet u përqendruan në zhvillimet politike në Shqipëri dhe rajon, si dhe në procesin e integrimit europian të vendeve të Ballkanit Perëndimor. U vlerësua përvoja e Kroacisë si model integrimi i bazuar në meritë dhe standarde demokratike.
Në fillim të takimit, Berisha shprehu mirënjohje të thellë për mbështetjen e vazhdueshme të Kroacisë ndaj Shqipërisë dhe shqiptarëve në rrugën drejt Bashkimit Europian, veçanërisht rolin e Plenković, president i HDZ. Ai u ndal te shqetësimet për situatën në Shqipëri, duke theksuar regresin demokratik, tendencat autokratike të qeverisjes, mungesën e zgjedhjeve të lira e të ndershme, ndikimin e krimit të organizuar dhe karteleve të drogës në procesin zgjedhor dhe jetën ekonomike, nivelet e larta të korrupsionit, si dhe mungesën e llogaridhënies institucionale.
Të dyja palët ranë dakord se procesi i integrimit europian duhet të mbështetet në meritë dhe përmbushjen e standardeve demokratike, duke shmangur qasje të bazuara vetëm në konsiderata gjeostrategjike. Plenković rikonfirmoi mbështetjen e Kroacisë për Shqipërinë dhe integrimin europian, duke nënvizuar rëndësinë e respektimit të kritereve demokratike.
Në përfundim, palët u angazhuan për forcimin e bashkëpunimit dhe shkëmbimin e eksperiencave, me synim mbështetjen e demokracisë dhe ardhmes europiane të Shqipërisë dhe rajonit. Në takim, Plenković shoqërohej nga Zdravka Bušić, zëvendëspresidente e HDZ dhe deputete, si dhe Andro Krstulović Opara, kryetar i Komitetit.