Sali Berisha mbajti fjalë nga foltorja para Kryeministrisë më 2 shkurt 2026, në kuadër të protestave kombëtare, ku u drejtua drejtpërdrejt forcave të rendit.
Ai u kërkoi efektivëve të mos zbatojnë urdhra të paligjshëm, sipas tij, dhe të shmangin çdo përplasje me protestuesit. Berisha nënvizoi se qytetarët nuk janë kundër policisë, por kundër kryeministrit Edi Rama dhe qeverisë, duke paralajmëruar se zemërimi i tyre "nuk mund të ndalet nga asnjë forcë".
Në fjalën e tij, Berisha foli për ndarjen brenda forcave të rendit: "Brenda gjirit tuaj ka njerëz të ndershëm, familjarë të shkëlqyer, atdhetarë të flaktë, njerëz të ligjit. Por brenda jush ka kriminelë, kopukë, trafikantë". Ai u bëri thirrje: "Mos zbatoni urdhrat e tyre. Shmangni çdo përplasje me qytetarët që po mbrojnë interesat tuaja, interesat e familjeve tuaja, interesin e vendit tuaj".
Berisha përmendi incidente të mëparshme: "Kam vënë re herën e fundit edhe keni gjuajtur, kishit futur edhe palaço që hidhnin kanistra gazi mes tyre". Ai u kërkoi policëve të mos bëhen "mburojë" e qeverisë dhe të mos mbrojnë atë që cilësoi si "organizatë kriminale", duke përmendur Edi Ramën dhe Lubi Ballukun.
Ai ftoi efektivët që në protesta të ardhshme të bashkohen me qytetarët për një "akt patriotik". Berisha përfundoi duke thënë se opozita po ecën drejt fitores dhe se të gjithë duhet të bashkohen "në çdo derë, në çdo votë, në çdo zemër".