Sali Berisha, kryetar i Partisë Demokratike, zhvilloi një foltore në zonën e Astirit në Tiranë më 5 maj 2026. Gjatë fjalimit, ai ripërsëriti thirrjen për protestën e parashikuar më 8 maj në rrugët dhe sheshet e Tiranës.
Berisha deklaroi se shqiptarët ndodhen në "kilometrin e fundit" të betejës së tyre. Ai tha: "Jemi në kilometrin e fundit. Përsëri, rruga është e vështirë, por absolutisht, Edi Rama është i pashpresë. Dhe ne do ta bëjmë këtë kilometër. Do ta bëjmë, për sakrificën tonë! Do ta bëjmë, për fëmijët tanë dhe të ardhmen e tyre! Do ta bëjmë, për dinjitetin e shqiptarëve, për të ardhmen e Shqipërisë! 8 maj është dita jonë!"
Sipas tij, më 8 maj do t’u themi shqiptarëve se "zotët e Shqipërisë jemi ne, dhe jo banda në pushtet". Ai shtoi se do t’i drejtojnë botës dhe Evropës mesazhin se janë "avokat të pamposhtëshëm të vlerave dhe të drejtave", të vendosur për të vazhduar betejën deri në rikthimin e tyre.
Berisha e përshkroi Edi Ramën si "armik i egër i shqiptarëve", "i të drejtave, i lirive, i mirëqenies, i sigurisë së këtij vendi" dhe si "një e keqe nga më të rrezikshmet". Ai ftoi të gjithë të ngrihen "madhërishëm në protestën tonë paqësore, në të drejtën tonë për dinjitetin e kombit tonë, për dinjitetin e vendit tonë".