Deputeti i zgjedhur i Aleancës, Besnik Tahiri, në një paraqitje televizive në emisionin Rubikon në Klan Kosova, ka sqaruar pozicionin politik të partisë së tij karshi zhvillimeve të fundit qeveritare. Sipas tij, nuk ka pasur asnjë ndryshim të raporteve me Qeverinë Kurti, ndërsa ka theksuar se partia nuk është duke negociuar për hyrje në qeveri.
Tahiri rikujtoi se Aleanca ka prezantuar një pozicion politik të bazuar në gjashtë kushte thelbësore, të cilat i konsideron si të rëndësishme për vendin. Ai shtoi se nëse do të kishte një ndryshim të qasjes, partia do të kishte iniciuar zyrtarisht negociata politike.
Sa i përket mundësisë së krijimit të një qeverie të pakicës, Tahiri shprehu qëndrimin kritik, duke e cilësuar këtë si një lëvizje taktike për t'i bërë opozitën përgjegjëse për situatat e bllokimit që mund të pasojnë në 60 ditët në vijim, sidomos përballë procesit të zgjedhjes së presidentit. Ai deklaroi se Aleanca nuk do të pranojë koncesione politike dhe theksoi se përgjegjësia për qeverisje mbetet e atyre që kanë siguruar votat.