Shefi i Grupit Parlamentar të Aleancës për Ardhmërinë e Kosovës, Besnik Tahiri, i ka bërë thirrje Kuvendit të Kosovës që në seancën e së hënës të miratojë Projektligjin për ndryshimin dhe plotësimin e Ligjit për Dhomat e Specializuara. Përmes një deklarate publike, ai ka kërkuar që ky ligj të kalojë në të dyja leximet, duke theksuar se me këtë proces nuk duhet të bëhet lojë politike.
Sipas Tahirit, ky miratim nuk duhet të shihet si përmbyllje e debatit, por si fillimi i një angazhimi më të gjerë institucional. Ai ka apeluar që procesi të mos shndërrohet në fushëbetejë për interpretime politike ose në garë mes forcave parlamentare se kush do të paraqitet më i zëshëm.
Lidhur me procedurat parlamentare, Tahiri ka kërkuar që në leximin e dytë të bëhet një shqyrtim i kujdesshëm për të verifikuar nëse Komisioni për Legjislacion ka lënë pa përfshirë ndonjë çështje thelbësore. Nëse vërehen mangësi, ai ka inkurajuar paraqitjen e amendamenteve për përmirësimin e tekstit ligjor.
Ai gjithashtu ka vlerësuar se, gjatë dy viteve të ardhshme, shteti i Kosovës duhet të dëshmojë seriozitet në raport me procesin gjyqësor në Hagë. Sipas Tahirit, institucionet duhet të ndërtojnë një qasje të qëndrueshme dhe të përgjegjshme për mbrojtjen e historisë dhe vlerave të luftës çlirimtare.