Të dhënat e Agjencisë së Statistikave të Kosovës tregojnë një ulje të numrit të veteranëve të luftës që marrin pension. Në muajin janar, pensione kanë marrë 38 063 veteranë, ndërsa në shkurt ky numër ka rënë në 37 893, pra 170 përfitues më pak.
Kreu i Organizatës së Veteranëve të Luftës së Ushtrisë Çlirimtare të Kosovës (OVL-UÇK), Hyseni Gucati, ka dhënë shpjegime për këtë fenomen në një deklaratë për "Front Online". Ai ka theksuar se rënia lidhet kryesisht me dy arsye: vdekjet e veteranëve dhe ndryshimet në statusin e punësimit.
Gucati ka përmendur se vetëm sot janë varrosur tre veteranë, ndërsa në muajin shkurt dhe mars deri tash janë varrosur 28 veteranë. Ai ka shtuar se disa veteranë punojnë në sektorin privat dhe po aplikojnë për pagë pune në vend të pensionit. "Rreth 37 mijë marrin paga", ka deklaruar Gucati.