Tregjet evropiane dhe aziatike të aksioneve u rimëkëmbën të martën, ndërsa çmimet globale të naftës ranë me rreth 8%, dhe çmimi referues evropian i gazit me rreth 15%. Kjo ndodhi pasi Presidenti i SHBA-së, Donald Trump, njoftoi se lufta SHBA-Izrael kundër Iranit mund të përfundojë më shpejt se sa pritej. Ditën e mëparshme, çmimi i naftës kishte kaluar 100 dollarë për fuçi, niveli më i lartë që nga viti 2022.
Në përpjekje për të qetësuar tregjet, Trump tha se do të heqë dorë nga disa sanksione mbi naftën pas një telefonate me Presidentin rus Vladimir Putin. Ai kërcënoi Iranin se do të përballet me goditje fatale nëse mbyll Ngushticën e Homuzit, duke thënë se SHBA do ta godasë 20 herë më fort dhe do ta bëjë praktikisht të pamundur rindërtimin e tij.
Përgjigjja e Iranit
Forcat iraniane deklaruan se nuk do të lejojnë eksportin e naftës nga rajoni drejt aleatëve të SHBA-së dhe Izraelit për sa kohë vazhdon lufta. Garda Revolucionare tha se shënjestroi bazën amerikane Al-Harir në rajonin e Kurdistanit të Irakut. Ministri i Jashtëm iranian Abas Atagchi përjashtoi bisedimet e mëtejshme me SHBA-në dhe premtoi vazhdim të sulmeve. Garda theksoi se fundin e luftës do ta përcaktojnë ata, jo amerikanët.
Emiratet e Bashkuara Arabe dhe Kuvajti njoftuan se po interceptojnë sulme me raketa dhe dronë nga Irani. Raportohen shpërthime në Teheran me mbi 40 viktima, si dhe raketa iraniane që godasin një kamp ushtarak gjerman në Jordani.
Zhvillimet në Liban dhe Izrael
Kryeministri izraelit Benjamin Netanyahu tha se operacioni kundër Iranit nuk ka përfunduar dhe se aspirata është që populli iranian të heqë dorë nga zgjedha e tiranisë. Ushtria izraelite njoftoi se do të godasë objektivat e Hezbollah-ut në qytetet jugore libaneze Tiro dhe Sidon, duke kërkuar evakuimin e banorëve. Ministria e Shëndetësisë libaneze raporton 486 të vdekur dhe 1.313 të plagosur nga sulmet izraelite që nga 2 marsi.
Lufta hyri në ditën e 11-të. Australia vendos një avion mbikëqyrës dhe jep azil për pesë futbollistë iranianë të kombëtares që kërkuan mbrojtje gjatë Kupës së Azisë.