Drejtori i Drejtorisë Vendore të Policisë Vlorë, Edvin Ndreu, prezantoi rezultatet e punës për muajin qershor 2026. Gjatë kësaj periudhe, krahas 65 të arrestuarve ose ndaluarve, 206 persona janë proceduar në gjendje të lirë dhe 9 janë shpallur në kërkim. Përmes operacioneve të ndryshme, si “Strike 5”, “Strike 6”, “Grupi”, “Catch” dhe “The Last Window”, policia sekuestroi 6 armë zjarri, 4 armë të ftohta, 138 fishekë dhe mbi 700 doza lëndësh narkotike të llojeve të ndryshme, si dhe katër apartamente dhe një njësi tregtare me vlerë rreth 400 mijë euro.
Në fushën e sigurisë rrugore, autoritetet vendosën 15 607 masa administrative, ndërsa u regjistruan 18 aksidente me pasojë humbjen e jetës së tre personave. Në lidhje me sigurinë detare, Drejtoria Vendore për Kufirin dhe Migracionin Vlorë raportoi se janë kontrolluar 1 555 mjete lundruese. Për shkeljet e konstatuara, janë bllokuar 66 mjete dhe janë vendosur 68 gjoba me vlerë totale 2.7 milionë lekë. Për më tepër, policia kufitare ndërhyri në 8 raste për t'u ardhur në ndihmë 31 personave në det.
Fluksi i shtetasve në pikat e kalimit kufitar për muajin qershor ishte 202 013 udhëtarë dhe 40 059 automjete, me një mesatare ditore prej 6 734 shtetasish. Për të përballuar shtimin e lëvizjeve, policia ka intensifikuar monitorimin nga toka dhe ajri, duke vendosur 135 punonjës shtesë në zonat bregdetare të Vlorës, Himarës dhe Sarandës.
Përditësime
Gjatë muajit qershor, Policia e Vlorës raportoi një rritje prej 42 veprash penale krahasuar me muajin maj. Gjatë operacioneve u sekuestruan lëndë të ndryshme narkotike, konkretisht tusi, ketaminë, MDMA, kanabis, kokainë dhe ekstazi. Në fushën e trafikut rrugor, u regjistruan 42 raste të drejtimit të parregullt të mjeteve, 12 më shumë se në maj, duke rezultuar në 14 arrestime. Për sezonin turistik, Policia e Vlorës ka vendosur si prioritet kryesor luftën kundër kultivimit të bimëve narkotike.