Trupi i pajetë i një biznesmeni 27-vjeçar u zbulua të dielën pasdite në një përrua afër Manastirit të Trinisë së Shenjtë, në zonën e Nea Peramos të Greqisë. Viktima ishte raportuar i zhdukur një javë më parë, pas rrëmbimit të tij në orët e para të mëngjesit të 26 janarit jashtë banesës në Elefsina.
Sipas hetimeve paraprake, autorët e kanë çuar të riun në një vend të izoluar, ku e kanë vrarë me të paktën shtatë plumba. Pas kësaj, dyshohet se kanë tentuar të vënë flakën trupit për të fshirë gjurmët, por pa ia arritur.
Rrëmbimi
Pamjet nga kamerat e sigurisë, të publikuara nga protothema.gr, tregojnë momentin e rrëmbimit. Biznesmeni shihej duke u kthyer në shtëpi në këmbë në orën 02:01, i veshur me kostum gri dhe bluzë me kapuç blu. Ndërsa hynte në rrugicën pranë pallatit ku banonte me partneren, një makinë blu afrohet nga drejtimi i kundërt. Brenda saj ndodheshin katër persona, të cilët nën kërcënimin e armës e detyruan të hipte dhe u larguan.
Partnerja e viktimës dorëzoi videon policisë dhe denoncoi zhdukjen. Nga analiza e pamjeve dhe targave, autoritetet konstatuan se makina ishte e vjedhur në Selanik.
Hetimi
Hetuesit po përqendrohen te motivi i krimit. Skenari i rrëmbimit për shpërblim është përjashtuar, pasi familjarët, pavarësisht pasurisë së viktimës, nuk morën kërkesa për para. Policia dyshon se vrasja lidhet me mosmarrëveshje financiare mes viktimës dhe autorëve.
Autoritetet po shqyrtojnë ngjashmëritë me një vrasje tjetër të vitit 2024 në zonën pyjore të Mandrës, ku një biznesmen u gjet i vrarë dhe trupi së bashku me automjetin u dogj nga autorët. Ende nuk dihet kohëzgjatja e qëndrimit të viktimës në duart e rrëmbyesve.