Seanca e 113-të plenare për pyetjet e deputetëve, e cila ishte e fundit përpara pushimeve vjetore, u shoqërua me tensione të larta. Deputetja e Lidhjes Shqiptare, Ilire Dauti, bllokoi foltoren e Kuvendit duke kërkuar një përgjigje nga kryeministri Hristijan Mickoski lidhur me Ligjin për Përfaqësim të Drejtë dhe Adekuat. Sipas deputetes, kjo pyetje ishte parashtruar që në seancën e datës 26 qershor, duke tejkaluar afatin ligjor 20-ditor për kthim përgjigjeje.
Situata u përshkallëzua pasi kryeministri Mickoski iu përgjigj pyetjes së liderit të LSDM-së, Venko Filipçe, duke anashkaluar kërkesën e deputetes Dauti. Në mbështetje të saj, në foltore qëndroi edhe kryetari i Lidhjes Shqiptare, Ziadin Sela, i cili deklaroi se seanca nuk do të vazhdonte pa marrë përgjigjen e kërkuar. Kryetari i Kuvendit, Afrim Gashi, shpalli fillimisht një pauzë prej 30 minutash, ndërsa pas rifillimit dhe debateve të vazhdueshme procedurale, e ndërpreu seancën deri në orën 14:00.
Deputeti i LSDM-së, Fatmir Bytyqi, kritikoi ekzekutivin duke e akuzuar për shmangie të qëllimshme të pyetjeve parlamentare. Nga ana tjetër, kryeparlamentari Afrim Gashi deklaroi se shërbimet e Qeverisë e kanë njoftuar se përgjigja do të vijë së shpejti, duke shtuar se bllokimi po pengon deputetët e tjerë në ushtrimin e të drejtës së tyre për pyetje.
Lidhur me Ligjin për Përfaqësim të Drejtë, Gashi theksoi më herët se po vlerëson momentin më të përshtatshëm për procedimin e tij në votim, duke mohuar zërat se kjo do të bëhej në mënyrë të fshehtë. Opozita ka shprehur vazhdimisht kundërshtime ndaj draftit aktual të këtij ligji.
Përditësime
Kryetari i Kuvendit, Afrim Gashi, deklaroi se mospërgjigjja ndaj pyetjeve parlamentare mund të ketë ndodhur për shkak të një teknikaliteti në sistemin e regjistrimit. Gjatë seancës, e cila u shoqërua me bllokim të foltores nga deputetët e Lidhjes Shqiptare, Gashi paralajmëroi deputeten Ilire Dauti se reagimi i saj procedural do të ishte i fundit, pas një përplasjeje për çështjen e mikrofonit. Në një takim me gazetarët, Gashi pranoi se Ligji për Përfaqësim të Drejtë mund të ketë mangësi, por e vlerësoi atë si të domosdoshëm për funksionimin institucional.
Tensionet në Kuvend janë përshkallëzuar pas ndërhyrjes së deputetit Rijad Shaqiri, i cili kërkoi fjalën për procedurë. Deputetja Ilire Dauti po mban të bllokuar foltoren, duke refuzuar largimin pa marrë një përgjigje. Kjo situatë ka ndërprerë punimet e Kuvendit, ndërsa thirrjet për rend nga kryesia kanë mbetur pa efekt.