Shqipëria po tërheq vëmendjen e turistëve ndërkombëtarë, sipas një artikulli në blogun amerikan të udhëtimeve Adventurous Kate. Artikulli e paraqet vendin si destinacion në zhvillim, që dikur ishte periferik në hartën turistike evropiane, por sot përjeton rritje interesi.
Vendi ofron një kombinim plazhesh me ujëra të kristalta në Ksamil, rrënojash antike në Butrint, arkitekture osmane në Berat, male dramatike dhe kulturë ballkanike autentike. Këto atraksione e bëjnë Shqipërinë alternativë për vizitorët që kërkojnë përvojë përtej destinacioneve klasike si Greqia apo Italia. Turizmi është në rritje, por pa mbingarkesë si në vende të tjera mesdhetare.
Sfida dhe avantazhe
Shqipëria mbetet pak e njohur në Evropë, sidomos për infrastrukturën e papërpunuar, e cila shihet nga vizitorët si pjesë e aventurës. Çmimet janë konkurruese: në Tiranë, një birrë kushton rreth 2,5 euro, një vakt mesatar nis nga 10 euro, ndërsa akomodimi varion nga bujtinat ekonomike deri te hotelet moderne në zonën Blloku.
Tirana, kryeqyteti energjik
Tirana habiton vizitorët me atmosferën energjike, ngjyrat e gjalla dhe jetën e natës aktive. Zona e Bllokut, dikur rezervuar për elitën komuniste nën Enver Hoxha, sot është lagje moderne me bare, restorante dhe dyqane elegante.
Përditësime
Travel + Leisure publikon një artikull të ri ku Stacey Leasca e promovon Shqipërinë si "perlë e fshehur", me plazhe të ngjashme me ato greke dhe qytete alpine si ato zvicerane.
Taib Dzemidzic, drejtor i tureve në Flash Pack, lavdëron rritjen e popullaritetit, mikpritjen, kostot e ulëta dhe e konsideron si destinacion ideal për udhëtime solo.
Artikulli thekson Riviera Shqiptare dhe Alpet Shqiptare si atraksione të reja.
Revista amerikane Quartz ka renditur Shqipërinë ndër 10 destinacionet më të përballueshme ndërkombëtarisht, duke theksuar koston e ulët të qëndrimit me një mesatare prej 50 dollarësh nata në Airbnb. Në përputhje me sugjerimet e blogut Adventurous Kate, ekspertët këshillojnë vizitat jashtë sezonit të pikut për të maksimizuar kursimet.
Botimi francez FullTravel.it e rendit Shqipërinë në hartën e destinacioneve kryesore kulturore dhe bregdetare për turistët evropianë. Publikimi sugjeron një itinerar njëjavor që përfshin Tiranën, Beratin dhe Gjirokastrën. Në kryeqytet, artikulli evidenton vizitat në Bunk’Art dhe teleferikun e malit të Dajtit si pika kryesore interesi për vizitorët.